Конкурс творчых работ, прысвечаны Году малой Радзімы
У першым семестры 2019-2020 навучальнага года кафедрай агульнаадукацыйных дысцыплін пры падтрымцы ПА ГА «БРСМ» БДУІР было праведзена традыцыйнае ўжо для ўніверсітэта мерапрыемства-конкурс творчых работ па беларускай мове. Прысвяцілі гэтае спаборніцтва Году малой радзімы.
Студэнты першага курса ўсіх факультэтаў рыхтавалі творчыя работы (празаічнае эсэ, апавяданне ці паэтычны твор) на любую з шасці прапанаваных тэм (на выбар удзельніка) на роднай, беларускай мове:
1. Мы з вамі дзеці адной гісторыі (У. Караткевіч);
2. Вядзі рашучы бой з натурай сваёй слабой (А. Вярцінскі);
3. Ніхто цябе так не шкадуе і не любіць, як маці (С. Грахоўскі);
4. Слова! Яно неабсяжнае, як сусвет (У. Юрэвіч);
5. Чым вякам ты пахвалішся, у вяках чым праславішся, час маторны
і мутарны, электронны, камп’ютарны (А. Грачанікаў);
6. Нашто, скажы мне, ты жывеш і з думкамі якімі? (А. Гарун).
Журы конкурсу: выкладчыкі беларускай мовы Н.Я. Пятрова,
Т.П. Дапіра, І.В. Наўроцкая, А.А. Албут.
Каля 400 студэнтаў спрабавалі сябе ў творчым выяўленні сваіх думак. Работы былі самыя разнастайныя па жанрах і стылістыцы. Студэнты БДУІР здолелі раскрыць свае здольнасці, упэўніўшы журы, што будучым інжынерам падуладныя не толькі мовы праграмавання.
|
Неабыякавая таленавітая моладзь і да беларускай мовы, на якой удзельнікі конкурсу выказалі самыя патаемныя свае думкі і разважанні. Некаторыя з іх:
"ты быццам маленькі атам, маленькая клетка, - неверагодна маленькі элемент дзесьці ў велізарным патоку эвалюцыі. Там, наперадзе, табе ўжо будзе дадзены сэнс простых рэчаў, але складаныя яшчэ будуць чакаць і цікавіць цябе. І гэта падштурхоўвае ісці далей, ісці да святла";
"без кахання чалавек проста абдзеленая істота, пазбаўленая сапраўднага жыцця і не здольная разумець іншага чалавека";
"сучасны чалавек пастаянна знаходзіцца ў руху, пад цяжарам нявырашаных пытанняў, неабходнасцю выканання тэрміновых заданняў. Не спыняючыся ні на хвіліну, ён пачынае бег ад сябе, ад праблем, ад адзіноцтва. Няма часу, каб спыніцца, азірнуцца, задумацца, угледзецца і ўслухацца ў сучаснасць";
"мэта - мара з часам выканання. У кожнага чалавека яны ёсць, але адрозненне ў іх маштабе. Зона камфорту - найбольшы вораг чалавецтва. Калі ты не выходзіш за яго межы, ты перастаеш жыць, развівацца, расці";
"едучы ў метро, аўтобусе кожны дзень, я бачу людзей, якія сядзяць у тэлефонах, якім зусім нецікава, што адбываецца вакол іх. Калі нешта здарыцца, яны хутчэй пачнуць здымаць на свой тэлефон, не жадаючы дапамагчы таму, хто мае патрэбу".
|
Сапраўды, з’яўляючыся асноўнай часткай духоўнай культуры, родная мова лічыцца адным з галоўных сродкаў ідэнтыфікацыі асобы. Мова - яшчэ і канал псіхалагічнага, інтэлектуальнага развіцця чалавека, што фарміруе менталітэт, самастойнасць. Новы стан развіцця сучаснага грамадства, вышэйшай адукацыі ў прыватнасці, спрыяюць таму, што ў БДУІР "Беларуская мова, культура маўлення" - больш чым вучэбны прадмет. Гэта таксама магчымасць для студэнтаў раскрыцца, творча праявіць сябе, выказаць уласныя думкі, сцвердзіць сваю індывідуальнасць!
Віншаванне пераможцаў конкурсу адбылося ва ўрачыстай перадкаляднай атмасферы з удзелам дэкана ФДПіПА В.М. Бандарыка. Пераможцы ўзнагароджаныя дыпломамі і памятнымі падарункамі. Кафедра агульнаадукацыйных дысцыплін выражае падзяку прарэктару па выхаваўчай рабоце Д.Ф. Кузняцову за падтрымку ў арганізацыі мерапрыемства.
Неабходна сказаць усім без выключэння ўдзельнікам: "Дзякуй за працы, за давер сваіх думак, за парады !!!"
І яшчэ хочацца пажадаць усім далейшых перамог у розных творчых мерапрыемствах і конкурсах, шырэйшага раскрыцця сваіх талентаў і здольнасцей!
Падрыхтавалі Таццяна Дапіра і Наталля Пятрова
|