Конкурс творчых работ па беларускай мове
У БДУІР падвялі вынікі традыцыйнага конкурсу творчых работ на беларускай мове сярод першакурснікаў.
Мерапрыемства штогод арганізуецца кафедрай агульнаадукацыйных дысцыплін пры дапамозе ППА студэнтаў БДУІР.
З 15 лістапада па 6 снежня ў студэнтаў першага курса, якія вывучаюць дысцыпліну "Беларуская мова. Прафесійная лексіка", была магчымасць прадставіць на конкурс празаічнае эсэ, апавяданне ці паэтычны твор на любую з дзесяці прапанаваных тэм. Журы ацэньвалі работы па наступных крытэрах: арыгінальнасць тэксту, мастацкі падыход, граматнасць, вобразнасць, творчы падыход да праблематыкі.
Па выніках конкурсу былі вызначаны пераможцы: Дыпломамі за трэцяе месца ўзнагародзілі Ягора Елінеўскага, Кірыла Каханоўскага, Рыгора Зарэцкага, Аляксея Самсончыка, Кірыла Чаплінскага, Алену Яваровіч, Елізавету Дзмітрыевіч, Данііла Пракаповіча; Другое месца занялі Алексей Мічэйка, Андрэй Шапялевіч, Арцём Штоў, Данііл Анташэнка, Міхаіл Рапацэвіч, Марына Тарасенка, Марыя Казлоўская, Вікторыя Палякова, Вікторыя Закрэўская; Першым месцам былі ацэнены працы Яна Сякацкага, Яўгеня Нікіценка, Ягора Белана, Яраслава Голуба, Аляксея Струнца, Марыі Саковіч, Марыі Валынец, Яны Румянцавай і Данііла Асіпёнка.
Удзельнікаў і пераможцаў узнагароджваў дэкан факультэта даўніверсітэцкай падрыхтоўкі і прафесійнай арыентацыі Васіль Бандарык.
У першым семестры 2022/2023 навучальнага года кафедра агульнаадукацыйных дысцыплін традыцыйна правяла для першакурснікаў конкурс творчых прац па беларускай мове. Дапамагала ў арганізацыі ППА студэнтаў БДУІР.
Удзельнікам далі шырокую прастору для творчасці. Ім было прапанавана 8 тэм, а конкурсная праца магла быць выканана ў форме празаічнага эсэ, апавядання ці паэтычнага твора. За аснову некаторых тэм былі ўзяты словы беларускіх пісьменнікаў: «Куды б цябе ні завяла дарога, не забывай бацькоўскага парога» (Пятрусь Броўка), «Радасна б’ецца ў кожнага сэрца, калі ён чуе пра славу і поспехі свайго роднага краю» (Кастусь Кірэенка), «Нямала раскідана ў свеце спакусаў - не бяжы на салодкі дым: нарадзіўся, жыві, будзь беларусам - як прадзеды і дзяды…» (Васіль Зуёнак) і інш.
Дыпломамі I, II, III ступені, падзякамі і падарункамі ад прафкама ўдзельнікаў узнагароджвалі дэкан факультэта даўніверсітэцкай падрыхтоўкі і прафесійнай арыентацыі Васілій Бандарык, загадчыца кафедры агульнаадукацыйных дысцыплін Валянціна Козел і выкладчыцы кафедры.
Як адзначае адказная за конкурс выкладчыца кафедры Таццяна Дапіра, моладзь - найважнейшы рэсурс грамадства, праз які рэалізуецца вялікая пераемнасць пакаленняў: «Вельмі ўсцешна, што першакурснікі ўдзельнічаюць ў конкурсе па развіцці нашай роднай беларускай мовы. Гэтымі працамі яны аддаюць павагу, даніну нашай народнай мудрасці, гістарычнай памяці і самасвядомасці беларусаў». Конкурс яшчэ раз пацвярджае факт, што ў БДУІР вучацца вельмі таленавітыя і творчыя студэнты. Яны сябруюць не толькі з інфармацыйнымі тэхналогіямі, але і са словам.
Конкурс студэнцкіх творчых прац на беларускай мове ўжо не першы год ладзіцца кафедрай агульнаадукацыйных дысцыплін. Бяруць удзел амаль усе першакурснікі, якія вывучаюць дысцыпліну "Беларуская мова. Прафесійная лексіка". Сёлета творчае спаборніцтва арганізоўвалася пад кіраўніцтвам усіх выкладчыкаў беларускай мовы : Саўчык М.К., Шматковай І.І., Лапцёнак А.М., Дапіры Т.П., Наўроцкай І.В., Албут А.А. пры значнай падтрымцы ППА студэнтаў БДУІР, якая дапамагла з цудоўнымі падарункамі для пераможцаў.
Студэнцтва - гэта самы яркі, незабыўны час жыцця. Захапляльныя лекцыі, першыя навуковыя пошукі, няўрымслівая смелая творчасць ствараюць адзіную, непадзельную плынь. Новы стан развіцця сучаснага грамадства, вышэйшай адукацыі ў прыватнасці, спрыяюць таму, што ў БДУІР "Беларуская мова, культура маўлення" - больш чым вучэбны прадмет. Гэта магчымасць раскрыцца, творча праявіць сябе, выказаць уласныя думкі, сцвердзіць індывідуальнасць!
Сёлета традыцыйнае ўжо для ўніверсітэта мерапрыемства-конкурс было праведзена кафедрай з дапамогай ППА студэнтаў БДУІР. Конкурсная работа прадстаўляла сабой празаічнае эсэ, тэма якога "А слова - сапраўды жывая рэч!" (Л.Геніюш).
Узнагароджвалі пераможцаў дэкан Факультэта даўніверсітэцкай падрыхтоўкі і прафесійнай арыентацыі Бандарык В.М., загадчыца кафедры агульнаадукацыйных дысцыплін Козел В.І., адказная за конкурс выкладчык кафедры Дапіра Т.П.
У першым семестры 2019-2020 навучальнага года кафедрай агульнаадукацыйных дысцыплін пры падтрымцы ПА ГА «БРСМ» БДУІР было праведзена традыцыйнае ўжо для ўніверсітэта мерапрыемства-конкурс творчых работ па беларускай мове. Прысвяцілі гэтае спаборніцтва Году малой радзімы.
1. Мы з вамі дзеці адной гісторыі (У. Караткевіч);
2. Вядзі рашучы бой з натурай сваёй слабой (А. Вярцінскі);
3. Ніхто цябе так не шкадуе і не любіць, як маці (С. Грахоўскі);
4. Слова! Яно неабсяжнае, як сусвет (У. Юрэвіч);
5. Чым вякам ты пахвалішся, у вяках чым праславішся, час маторны
і мутарны, электронны, камп’ютарны (А. Грачанікаў);
6. Нашто, скажы мне, ты жывеш і з думкамі якімі? (А. Гарун).
Журы конкурсу: выкладчыкі беларускай мовы Н.Я. Пятрова,
Т.П. Дапіра, І.В. Наўроцкая, А.А. Албут.
Каля 400 студэнтаў спрабавалі сябе ў творчым выяўленні сваіх думак. Работы былі самыя разнастайныя па жанрах і стылістыцы. Студэнты БДУІР здолелі раскрыць свае здольнасці, упэўніўшы журы, што будучым інжынерам падуладныя не толькі мовы праграмавання.
У сакавіку-красавіку 2019 г. на кафедры агульнаадукацыйных дысцыплін быў арганізаваны конкурс студэнцкіх эсэ на тэму "Беларуская мова. Навошта асабіста мне…". У конкурсе спаборнічалі студэнты 1-га курса пад кіраўніцтвам загадчыка кафедры Пятровай Н.Я і выкладчыка Дапіра Т.П. Узнагарода лепшых адбылася 22 красавіка ў святочнай атмасферы з падтрымкай БРСМ.
